إنما الأشعار بالنيات ... الزجال الكبير محمد طعيمة

تقاسيم على أوتار الجمال.. من العدد الثالث من مجلة صوت الشعراء
من ديوان : إنما الأشعار بالنيّات
مع الشاعر الكبير : محمد طعيمة
*********

مملوك
***
يبيعوا الشسمس ليلى يهل
يبيعوا الأمس فجرى يضل
ويصرخ قولى من هولى
بيملك أمر مجهولى
ذليل بيذل


فى السما التامنة
***
بلاش طمع خلينا ذوق
ده لولا هما ما كنا فوق
ومهما يعلوا للعلا
م احنا اعلى منهم
ع الخازوق

إنتم الناس
***
الشاعــر يعنى مشاعــر
يعـنى يـحـس
الشاعر هو اللى ما يخضعش
لقولة بس
الشــاعــر كـان
خـلــف الـقـطـبـــان
له ألـف لـســـان
معـصوم م الحـبـس

نـقــــاب
***
( بـانـت سـعــاد )
من ألف عـــام
جـاى النـهــاردة
تقول حـرام !!


يا لئيم
***
مستشقيات أشكال والوان
والعيانين كالحشر طوفان
سألت نفسى بخبث برىء
مين اللى فاضل مش عيان ؟!

إنت الحب
***
صوفتنى وطنى فى حبك
م انت الطريق لله رؤياك
ولو " يهودى فى يوم حبك "
( يحلالى اجيب سيرتك وياه )

وحدوووووووه

***
( مات الملك .. عاش الملك )
ده المتبع فى المملكات
إلا فى بلدنا ( التايتنيك )
عاش الملك والشعب مات


نوم العوافى
***
وصاحى بجرحى صباحى
أنادى النجدة لجراحى
تقوللى ( لما بابا ينام )
( وبابا ) إمتى كان صاحى

وسيبنى أحلم
***
لساك يامصرى عزيز القوم
والحلو طبعك ربانى
إياك يداخلك شك فى يوم
إنك مازلت الحلوانى