من فضلكم ........
ما تروحوش دلوقت
ده لسه فاضل من زمن باهت
دمع و عذاب الورد
لسه تلقيمة غنا..... ف كوبيات الكون
لسه حنان......
...........معرفة.....
.................ريحة جنون
سهر العيون لو ليلكوا ده يمتد
شارع صحابى ...على كل ناصية جرح
على كل عتبة بيت.......
وكل لقمة بملح
على كل آهة بصوت
مكتوب علينا الموت
من غير ما يظهر فرح
كل البلاد مجرمة .......
كل المدن قاتلة
كل الخطاوى ألم
كل السنين فاشلة
واحنا ما زلنا هنا
جوة القصيدة غنا
برة القصيدة مقاومة
قامت قيامة وردنا
بعطر عفوى برئ
ورا الضحايا قمر
شقشق لبكرة طريق
عذاب ف روحه لغة
وسيناريو للحكايات
تبدأ بحارة سد
تفتح طاقات الوجد
من شباكين ف الروح
من ضحكة المحبوب
وقلب بات مجروح
يحلم يدفى البرد
بحضن لسه برئ
عاوز يشق الريق
من غنوة طعم جديد
مجداف ف إيدى عجوز
عنيد .....
وعنده أمل
إن اللى كان يكتمل
والشط ما يبعدش
الشط مش صبية
جنية فوق المية
خلتنى أبوح بالشعر
أرسم مراكب فضى
بالسر أنا متوضى
شاعر عذابه غريق
من فضلكم ........
متروحوش دلوقت
ده لسه باقى لليالى شمس
ولسه باقى من زمن باهت
دمع و عذاب الورد
ليست هناك تعليقات:
إرسال تعليق