الوطن فى الإنعاش بقلم القامة الأدبية الكبيرة /عادل عوض سند

الوطن فى الإنعاش :
.............................
قلب الوطن موجوع
والنغز مش ساهل
شيلنا طبيب { مخلوع }
جيبنا طبيب جاهل ...

تمانين سنه ذاكر
جايب يا دوب مقبول
بيقولها مش ناكر
انه طبيب { ماء . بول } ...

زاد الالم .. والآه
والحاله فى النازل
ياريتنا ما اخترناه
وياريته يتنازل ...

مكانش هوه الامل
ولا شخّص العِلّه
فى كدبه لايُحتمل
وبان مالوش مِلّه ...

وهمنا ان علاج
القلب دا ف ايده
اتاريه طبيب محتاج
الرأى من { سيده } ..

وكل يوم الحال
بيسوء عن الاول
وكل يوم يتقال
الحاله حا تطوّل ...

تشخيصه كله عيوب
والنيه مش صافيه
جيبنا طبيب معيوب
جاب للوطن كافيه ...

دمر مفاضل وطن
وعاملنا شماعه
نشر فى جسمه العطن
بجماعه { منصاعه } ...

ولائه ليهم بان
من اول الجوله
وخطة { الأخوان }
تبقالهم الدوله ...

فبلاش بقى تلعب
على حتة الاسلام
صدقنى راح تتعب
الشعب فاق { يا امام } ...

وصاحبنا قال زعلان
ان الوطن .. مدد
ونسمعوه فى بيان
طالع .. وبيعدد ...

انا قلت م الاول
يلزم طبيب تانى
ولا شخص متحول
مهزوز وبيعانى ...

وللاسف { جماعات }
عايزه الوطن معلول
وبيعملوا الصفقات
{ بالمرشد } المخبول ...

بس المريض قلبه
لازم حا يتعافى
{ ومؤامره } لو جنبه
مرصوده .. متشافه ...

اما الوطن إن عاش
فبفضل اولاده
حا يدخلوه الإنعاش
وحا يعلنوا .. ميلاده ..